Digon i'r Diwrnod

Popular author Geraint Evans' fifth novel about Gareth Prior and his team of detectives in the Dyfed-Powys Police Force. The main thread of the story relates to one day, during which a judge and his family are kept captive in his home by two drug dealers.

Review :
Pumed nofel yr awdur poblogaidd o Dalybont am Gareth Prior a'i dim o dditectifs o Heddlu Dyfed-Powys. Bydd holl ddigwyddiadau prif rediad y nofel wedi'u cwmpasu i un diwrnod. Mae gwarchae mewn tA* barnwr lle caiff ef a'i deulu eu cadw'n gaeth gan ddau ddeliwr cyffuriau. Nid Morse, Rebus, Vera na Saga Noren mo Insbector Gareth Prior. Os rhywbeth, mae o’n fwy o linach Miss Marple. Gareth Prior ydi’r heddwas yn y nofel ddiweddaraf yng nghyfres Geraint Evans o straeon am drais a throsedd, ac mae’r frawddeg fer sydd yn cwta gyfeirio ato ar y clawr cefn yn gwbl gywir. ‘Dirgelwch arall i Insbector Gareth Prior a’i dîm’ ydi Digon i’r Diwrnod sydd yn disgrifio gwarchae pedair awr ar hugain mewn tŷ unig ym mherfeddion Ceredigion. Eilbeth yw cymeriad yr Insbector i’r ffeithiau sydd yn gyrru’r stori yn ei blaen, ac nid beirniadaeth yw hynny. A dweud y gwir mae’n chwa o awyr iach mewn genre sydd fel petai'n mynnu bod gan bob heddwas ryw nodwedd yn ei gymeriad sydd yn lliwio’r stori, boed hynny yn hoffter o gerddoriaeth glasurol a phos croeseiriau, y ddiod gadarn, hen het neu awtistiaeth. Mae strwythur straeon ‘Miss Marple’ yn caniatáu i’r darllenydd ddilyn ôl ei throed wrth iddi ganfod a symud o’r naill ffaith i’r llall. Dyma yn union mae Geraint Evans wedi ei wneud. Y gwahaniaeth pwysig yw nad yw’r ffeithiau yn Digon i’r Diwrnod yn ymylu ar yr anghredadwy na’r datrysiad yn dibynnu’n llwyr ar ddawn un ditectif. Mae ôl-straeon y cymeriadau yn gwthio’r stori yn ei blaen. Maen nhw i gyd yn stereoteips, sydd yn help garw i ddatblygu’r plot. Nid oes gwir angen i’r darllenydd wybod popeth am bawb a dim ond cyfeirio at fagwraeth anffodus un o’r trosedddwyr, marwolaeth cariad yr Insbector ac yn y blaen wna’r awdur. Mae’r cynildeb yma yn golygu nad ydi’r darllenydd yn cael ei ddal yn ôl gan ormodedd o gyd-destun ac eglurhad. Mae cynildeb y cyflwyno ar y ffeithiau allweddol hefyd yn nodwedd o saernïo crefftus y nofel, a rhoddwyd sylw teilwng i natur gwaith yr heddlu cyfoes a’r math o droseddau a geir hyd yn oed yng nghefn gwlad Gwalia Wen erbyn heddiw. Ar brydiau ceir gormod o gynildeb, efallai. O’m profiad i, criw cymharol dawedog oedd yn y gynhadledd i’r wasg a dwi’n synnu mai dim ond un hac fentrodd yn agosach at y gwarchae! Mae diweddglo’r nofel yn gwbl gredadwy – â bywyd yn ei flaen wrth i bawb fwynhau neu ddioddef canlyniadau eu gweithrediadau. Ond rhwng Y Gwyll, nofelau Myfanwy Alexander a rŵan rhai Geraint Evans, mae canolbarth Cymru bellach yn swnio’n fwy peryglus na hyd yn oed Sgandinafia.