Elain

A gripping novel about a television presenter who returns to her home on Anglesey, thereby re-living past tensions and re-opening scars for herself, her family and other inhabitants of the area; the novel was placed second in the 2003 Daniel Owen Memorial Award competition.

Table of Contents:
1. Llyfrau Newydd (Cymraeg a Dwyieithog) / New Books (Welsh-language and Bilingual); 2. Adargraffiadau (Cymraeg a Dwyieithog) / Reprints (Welsh-language and Bilingual); 3. Cylchgronau (Cymraeg a Dwyieithog) / Magazines (Welsh-language and Bilingual); 4. Cryno-ddisgiau (Cymraeg a Dwyieithog) / Compact Discs (Welsh-language and Bilingual); 5. CD-ROMau (Cymraeg a Dwyieithog) / CD-ROMs (Welsh-language and Bilingual); 6. New Books (English-language) / Llyfrau Newydd (Saesneg); 7. Reprints (English-language and Bilingual) / Adargraffiadau (Saesneg a Dwyieithog); 8. Magazines (English-language and Bilingual) / Cylchgronau (Saesneg a Dwyieithog); 9. Ar gael trwy'r Cyhoeddwyr yn unig / Available from the Publishers only

Review :
Mae Elain yn gyflwynydd teledu llwyddiannus ac, fel nifer o sêr y cyfryngau, newidiodd ei henw. Gollyngodd yr ‘e’ ar ddiwedd ei henw gwreiddiol. Ond nid rheolau Equity a orfododd y newid, na’r awydd i gael enw a oedd yn fwy deniadol i’r gwylwyr. Roedd y cymhelliad yn llawer dyfnach na hynny. Trwy ddileu’r ‘e’ gobeithiai hefyd ddileu o’r cof agweddau o’i gorffennol, ac roedd Cymreigio’r enw Elaine yn rhan o hynny. Breuddwyd gwrach, wrth gwrs, a phan orfodir Elain i ymweld â bro ei mebyd er mwyn creu eitem ar gyfer ei rhaglen, gorfodir hi hefyd i wynebu’r gorffennol yr oedd wedi ceisio ei wthio i’r isymwybod. Mae’r nofel ddiddorol hon yn adrodd hanes y dyddiau a dreulir gan Elain yn ôl yn ei chynefin ar Ynys Môn, a chawn gwrdd â’r holl ’sgerbydau a ddaw allan o’u cypyrddau o ganlyniad i’w hymweliad. Yn ei dull crefftus arferol llwydda Sonia Edwards i ddatgymalu ei chymeriadau nes eu bod yn noeth o’n blaenau. A phan ddychwela Elain i ddiogelwch ymddangosiadol ei chartref yng Nghaerdydd wedi’r dyddiau cynhyrfus, mae un sgerbwd arall yn aros amdani. Mae hon yn nofel fer iawn a thybiaf y bydd y mwyafrif o ddarllenwyr yn ei chwblhau ar un darlleniad. Mae’n bosibl mai rhuthr i’w gorffen cyn dyddiad cau cystadleuaeth neu er mwyn ei chyhoeddi sy’n gyfrifol am y byrder ac am yr ail hanner carlamus. Beth bynnag yw’r rheswm, mae’r nofel yn wannach o’r herwydd a chollwyd cyfle i ddatblygu’r cymeriadau a’r themâu yn enwedig o gofio pa mor grefftus yw Sonia Edwards wrth weu stori ac ymdrin â seicoleg ei chymeriadau. Roedd beirniaid cystadleuaeth Gwobr Goffa Daniel Owen yn Eisteddfod Maldwyn a’r Gororau, er yn credu bod iddi nifer o gryfderau, o’r farn ‘bod y nofel [hon] yn ymylu ar fod yn opera sebon gan fod y plot yn cynnwys cymaint o ddigwyddiadau ystrydebol’. Gan mai’r opera sebon yw’r ffurf drama mwyaf poblogaidd ar y teledu a bod un sianel yn honni fod pawb yn siarad am ei chyfres hi, yna gellid ystyried y tebygrwydd yn gryfder. Mae’n wir fod rhan olaf y stori braidd yn felodramatig, ond mae i’r nofel hynod o ddarllenadwy hon ddyfnder hefyd; mae agweddau ohoni yn adlewyrchu sefyllfa’r Gymru gyfoes ac yn llwyddo i godi rhai cwestiynau annifyr am gyflwr y gymuned Gymraeg draddodiadol. Ond nid nofel wleidyddol mohoni. Nofel ddifyr am ferch yn cael ei gorfodi i wynebu ysbrydion o’i gorffennol yw hi, ac mae hi’n werth ei phrynu a'i mwynhau.