O Ffyrgi i Ffaro - Hunangofiant Bryan yr Organ

The autobiography of the Welsh rugby supporter who was made famous by the 'Mad Welshman' clip posted by his son on YouTube after a Six Nations international game. 136 photographs.

Review :
Hunangofiant y cefnogwr rygbi gwallgo, Bryan yr Organ  Dyma hanes aderyn brith. Bryan yr Organ a ddaeth I enwogrwydd drwy ei antics ar YouTube adeg gêm rybgi ryngwladol. Heb yn wybod iddo fe ffilmiodd ei fab ef yn mynd dros ben llestri wrth gefnogi tîm Cymru a daeth yn seren dros nos wrth i filoedd o bobol wylio’r clip.  Bellach mae Bryan hefyd yn un o gymeriadau cyson rhaglen Tommo ar Radio Cymru ac mae’n wyneb adnabyddus ar raglen Jonathan ar S4C.  Ond y mae mwy i Bryan yr Organ na dim ond ei organ. Mae Bryan wedi cael sawl swydd yn ei fywyd, bellach mae’n gyrru bysiau ysgol. Ond mae sawl stori goch ganddo i’w hadrodd.  Yn gefndir i’r ffaith ei fod yn gymeriad y mae hanes trist ei fywyd cynnar sef iddo gael ei fabwysiadu. Y mae Bryan am archwilio’r llon a’r lleddf yn ei fywyd yn y gyfrol hon.  Mae Bryan yr Organ yn un o gymeriadau lliwgar cefn gwlad Ceredigion. Mae pawb ohonom, yn ôl Andy Warhol, yn debyg o ennill chwarter awr o enwogrwydd yn ystod ein hoes. Daeth tro Bryan Jones, neu Bryan yr Organ, yn 2012 pan ddaliwyd ef ar gamera ffôn poced yn mynd yn wallgof wrth wylio gêm rygbi rhwng Cymru a Lloegr ar y teledu. Fe aeth y cyfryngau cymdeithasol yn wenfflam wrth iddo ddymuno’r gwaethaf i ‘Ffaro’. Do, daeth iddo enwogrwydd a hynodrwydd. Ond yn wahanol i honiad Warhol, parhaodd enwogrwydd Bryan gan ddarparu iddo le rheolaidd ar raglen Tommo yn ddyddiol ar Radio Cymru. Rwy’n gyfarwydd â Bryan ers blynyddoedd. Ond yma cefais olwg newydd arno. Y tu ôl i’r agwedd ffwrdd-â-hi mae yma ŵr sensitif ac, ar brydiau, ŵr lleddf. Wyddwn i ddim, er enghraifft, mai baban mabwysiedig oedd Bryan. Cawn ganddo’r hanes am ei benderfyniad i ganfod ei fam fiolegol. A chawn brofi’r boen o orfod dioddef, yn blentyn, ensyniadau slei pobl oedd yn edliw iddo amgylchiadau ei enedigaeth a’i genedligrwydd. Nid fod unrhyw angen iddo gywilyddio. Fe’i codwyd yn dyner a pharchus gan ei rieni maeth, a chanfu iddo gael ei eni ‘ar yr ochor Gymraeg i’r afon’ yng Nghasnewydd. Sut fedrai colbiwr geiriol y Ffaro rygbi Seisnig ddim bod yn Gymro? Mewn hunangofiant hynod ddarllenadwy a ysgrifennodd ar y cyd â Terwyn Davies cawn bortread byw o’r organydd rhadlon. Cyfeiriais eisoes at ei lysenw Ffaro. Beth am y Ffyrgi sy’n y teitl? Wel, llysenw arall ar Bryan oedd hwnnw oherwydd ei hoffter ar iard yr ysgol fach o ddynwared sŵn tractor. Hwnnw, wrth gwrs, yn Ffyrgi. Cawn gefndir ei fywyd cefn gwlad, ei gyfnod fel cysodydd gyda’r Cambrian News ac yn y Llyfrgell Genedlaethol cyn cychwyn ei fusnes ei hun yn llunio arwyddion. Cawn ei gefndir cerddorol gyda’r Gwerinwyr ac fel un a fu’n darparu oriau o ddiddanwch ei hun ar yr organ a’r acordion. Ac, wrth gwrs, hanes y teulu, yn cynnwys y cyfnod pan fu ef a Ceinwen ei wraig yn rhedeg tafarn. Syniad da fu cynnwys, ar y diwedd, sylwadau ffrindiau a theulu am Bryan. Maent yn cynnwys y tenor Vernon Maher a’r cyn-DJ Eifion ‘Bodyshaker’ Williams; Erwyd Howells wedyn, sydd yn alwr twmpath dawns. Cawn sylwadau Ceinwen, y wraig, a Lisa’r ferch ar ran y plant. Dyma, yn sicr, hunangofiant cynnes sy’n portreadu cymeriad hoffus a wnaeth ei ran yn gwneud yr hen fyd yma’n lle haws i’w oddef, er gwaethaf aml i Ffaro.