Dyddiadur Dyn Priod (CD)

A three hour CD of humour about Goronwy Jones, a man who tries to settle into married life with the jet-setters in Cardiff. After years of crawling the pubs of the city, he must now learn to appreciate the opera, gastronomy and middle-class culture. Trouble doubtlessly ensues.

Review :
Dyma dair awr o ddoniolwch pur am helyntion y Dyn Dŵad, sy’n ceisio setlo lawr i fywyd priodasol yng nghanol crachach Caerdydd. Ar ôl blynyddoedd yn crwydro strydoedd a thafarnau’r brifddinas mae ymdrechion y cofi pengoch, Goronwy Jones, i werthfawrogi opera, bwyd da a’r ‘pethe’ gyda’r dosbarth canol Cymraeg yn troi’n fethiant llwyr, ac yn arwain at argyfyngau lu... Seiliwyd ar y clasur o nofel Un Peth ’di Priodi, Peth Arall ’di Byw gan Goronwy Jones, sef dilyniant i Dyddiadur Dyn Dŵad. Cyhoeddiad ar ffurf Cd dwbl o chwech o raglenni a ddarlledwyd ar Radio Cymru yn ystod haf 2006. *********************************** Mwy o’r Dyn Dwad – ar CD Yn dilyn llwyddiant llyfrau diweddaraf y Dyn Dŵad (Walia Wigli a Chwarter Call) comisiynwyd cyfres radio newydd wedi ei seilio ar y clasur o nofel Un Peth Di Priodi, Peth Arall Di Byw (dilyniant i Dyddiadur Dyn Dŵad), a darlledwyd y gyfres honno yn ystod yr Haf, fel Dyddiadur Dyn Priod. Bu’r ymateb i’r gyfres honno mor dda fel y cydweithiodd Y Lolfa a’r BBC i gyhoeddi CD dwbwl o chwech rhaglen gyflawn o’r gyfres, lle mae’r cofi pengoch yn ymlafnio i geisio gwneud sens o’i fywyd newydd fel dyn priod caeth yng nghanol crachach Caerdydd. Yn ôl Lefi Gruffudd o’r Lolfa: “Gyda’r deunydd crai mor wych a’r actorion mor broffesiynol doedd hi ddim syndod i’r gyfres gael ymateb mor dda. Gobeithio y darlledir rhagor o’r math yma o beth, ac y bydd modd cyhoeddi mwy o CDs o gomedi ysgafn yn y dyfodol.” Dau gryno-ddisg sydd yma yn cynnwys y gyfres o chwe rhaglen radio gafodd eu recordio yng Nghaerdydd a Chaernarfon ym mis Mawrth eleni a’u darlledu dros yr haf. Mae’n addasiad o nofel Dafydd Huws, Un Peth ’di Priodi, Peth arall ’di Byw, oedd ei hun, wrth gwrs, yn ddilyniant i glasur yr un awdur o’r 1970au, Dyddiadur Dyn Dŵad. Mi gafodd honno ei throi’n ffilm yn eithaf llwyddiannus rywbryd yn y 1980au, gyda Llion Williams yn llenwi sgidiau Goronwy Jones i’r dim, a helyntion hynod ddoniol y Cofi diniwed yn y brifddinas, a’r adar brith hynny a ddaeth yn ffrindiau mynwesol iddo yn dod yn fyw o flaen ein llygaid. Llion Williams ydi Goronwy Jones o hyd, Goronwy sydd dipyn yn hŷn erbyn hyn ond heb fod fawr ddim callach. A gyda chymorth yr actorion Rhian Morgan, Emyr Roberts, Huw Davies a Sara Cracroft, a chameo doniol iawn gan y dyn ei hun, Hywel Gwynfryn, cawn glywed hanes y Dyn Dŵad yn ceisio setlo i lawr i fywyd priodasol yng nghanol crachach Caerdydd. Ac mae chwerthin y gynulleidfa’n dyst i’r digrifwch, er bod yr ymateb yn amrywio o raglen i raglen. Pan gyhoeddwyd y nofel ym 1990, wnaeth hi ddim yr un argraff arnaf fi â’r Dyddiadur gwreiddiol, a hynny o bosib am nad oedd hi mor hawdd cynhesu at gymeriadau fel Siân a’i ffrindiau, Ben a Lun, ac er mor ddigri a chlyfar oedd llawer o’r llinellau, roedd ymestyn yr arddull chwarae-efo-geiriau dros nofel gyfan ychydig bach yn feichus. Dydi hynny ddim yn broblem ar y disgiau, ond os oes gen i feirniadaeth, efallai fod tuedd i or-actio rhai o’r cymeriadau, lle byddai mwy o gynildeb wedi gweddu’n well. Ta waeth, mae’n braf clywed y jôcs eto, ac mae’n werth gwrando ar y CDs i glywed y dynwarediad o’r ‘cynhyrchydd teledu annibynnol’ – sy’n swnio’n hynod o debyg i un o’n dramodwyr teledu enwocaf ni. Yn y car ar yr A470 i lawr i Gaerdydd y gwrandewais i ar Dyddiadur Dyn Priod, ac mi brofodd yn ffordd ddifyr iawn o basio’r siwrnai. Ac mi wnaeth imi deimlo’n reit ddiolchgar mai dim ond mynd i lawr am benwythnos roeddwn i!